Блог

Како изгледа летото во Крушево?

Секое лето е посебна авантура во Крушево, особено изминатите години кога параглајдинг сезоната се проширува. Летотo трае барем 2-3 месеци подолго и затоа станува се повозбудливо, интересно и атрактивно.

Првите групи на параглајдеристи пристигнуваат уште во април, а првите меѓународни натпревари започнуваат кон крајот на мај.

Првите попопуларни настани започнуваат во мај. Во овој месец се одржува фестивалот „Вечери во чест на Васил Иљоски“, а веќе од јуни Крушево има настани речиси секој викенд.

Јули е најжешкиот месец не само заради температурата, туку заради содржината. Тогаш се одржува „Крушево будно“, „Гитар фест“ и неколку параглајдинг натпревари. Градскиот парк е полн секој ден, локалните кафулиња, пицерии и ресторани се исполнети до последното место на пладне и во вечерните часови. Во Крушево владее пријатна атмосфера пропратена со мирис на добра храна и чист воздух.

Речиси секоја година во месец август се одржува или Светско или Европско првенство во параглајдинг или змајарство. Небото е исполнето со падобрани, а настанот Десет дена Крушевска Република е како шлаг на прекрасната крушевска торта. Тогаш се одржуваат и уникатни настани како Крушево низ корија со планинарски и велосипедски тури.

Сезоната продолжува и во септември со параглајдинг натпревари, одржување на настанот „Одбележување на 8-ми септември“ и еден од фестивалите со голем потенцијал Taste Krusevo.

Октомври е месецот кога се одржуваат настани за Тоше и последните параглајдеристи ги завршуваат последните летови.

Летото трае подолго од порано и Крушево станува сезона за цела година. За брзо време Крушево ќе биде познато како дестинација за 4 сезони, а не како место кое има летна и зимска сезона. Крушево е вашата дестинација за ова лето.

За Крушево

На изгрејсонце Крушево здогледано од подножјето на Баба Планина, блескоти како бисерче тукушто извадено од вода. Од најстарите времиња Прилеп му бил единствената врска со светот. А од подножјето има уште пет до шест километри. Со секој од нив надморската височина се зголемува за стотина метри, за да стигне до 1250. Град меѓу повисоките во светот, највисок на Балканот.

Сегашниот асфалтиран и широк пат е покус за километар-два од дамнешниот турски, најпрвин макадам, а потоа во коцки, но тесен за да не можат да се разминат две возила, ако оној што доаѓал одозгора не подзастанел на некоја ширинка.

Овде онде и денес се гледаат трагите од кривулестите серпентини. За нив пак останала легендата дека настанале за тоа што градителот бил пазарен за секој километар да добие товар злато. Алчен по златото тој го направил ем тесен ем кривулест.

Градот е поставен во пазувите на Баба Планина, токму како некакво бабино милениче, затскриено од ветриштата, од лошите погледи и натрапници. Под градот- полегнати облаци ,,Пелагониско море” .

Ова лето #ДомаСиЕДома

Македонија има прекрасни дестинации за одмор, авантура, истражување. Нашата држава има толку многу бисери што ова лето ќе го направат дури и поубаво од другите кога сите посетувавме странски дестинации.

Крушево е еден од тие бисери. Крушево е уникатно по својата природна положба, по својата понуда и по скорешниот развој во оваа област. Крушево е единствено само по себе.

Во Крушево има можност за активен туризам. Почнувајќи од планинарски и велосипедски тури, следење параглајдинг, прошетки по крушевската корија и собирање билки, културни настани, храна и многу други работи.

National Geographic со препорака: Пробајте параглајдинг во Крушево

Македонија има уште многу места кои можете да ги посетите ова лето. Не го одминувајте Крушево, но изборот за домашни дестинации е навистина голем. Низ цела држава можете да најдете чист воздух, планина, вода, музички и спортски настани, вкусна храна, гостопримство… Ова лето #ДомаСиЕДома

*Викенд во Крушево ја поддржува кампањата за промоција на домашните дестинации и ги повикувам сите македонски туристи летово и до крајот на годината да ги посетуваат домашните дестинации. Македонија има што да понуди. Крушево има што да помини. #ДомаСиЕДома