When in Krusevo 2024 ќе биде за најнеприметливите, само тимската работа носи успех

When in Krusevo 2024 ќе биде за најнеприметливите, само тимската работа носи успех

Добредојде за Димитар Ангелкоски – препознатливото име со кое се врзува фестивалот на отворено When in Krusevo. За околу еден месец ќе се дружиме во Крушево на новото издание со ново развиен концепт и компонента која ќе ве привлече да земете учество.

Но, да не зборуваме ние, туку да му дозволиме на Димитар да ни’ каже повеќе за фестивалот.

Advisor: Кој е концептот за фестивалот за годинава? Можеме ли да очекуваме нешто ново? Има ли нешто ексклузивно да споделиш со нас?

Димитар: Како што изминуваат годините веќе можете да забележите дека има премногу настани и фестивали низ држвата споредбено со годините кога започнавме со When in Krusevo. Со тоа се зголемува нашиот предизвик да бидеме поиновативни и поразлични од другите. Фестивалот е присутен веќе осма година и секоја година даваме се’ од себе да понудиме нешто ново, се разбира во рамките на нашите можности. Нашата пракса е да ги задржиме омилените активности на учесниците, а воедно да понудиме и нешто ново и различно од останатите. Со оглед на тоа дека досега направивме доста за промоција на нашиот град, оваа година решивме освен тоа да оставиме и нешто видливо за нашите крушевчани. За оние најранливите, најнеприметливите.

When in Krusevo е закажан за 05.07-07.07.2024 година со нови млади сили, но и со хуманитарен карактер и посебен фокус на инклузивност на маргинализираните групи. Тоа што можеме да ви го споделиме најексклузивно е соработка со нови поддржувачи и спонозри на фестивалот, оние со големо срце и душа кои несебично застанаа позади нашата идеја. Во соработка со Донирај компјутер планираме да донираме околу 20 компјутери на семејствата од Крушево кои имаат згрижено деца со посебни потреби, исто така ќе донираме и пакети со храна, а предвидено е од секоја продадена онлајн карта да одвоиме 100 денари за најмалку едно социјално ранливо семејство од нашиот град. Имаме уште идеи кои се надеваме во наредниот период дека ќе ги реализираме. Затоа и би сакале да апелираме до сите оние ентузијасти и вљубеници на Крушево кои сакаат да помогнат или да се вклучат на било кој начин, слободно нека не’ исконтактираат.

Advisor: Како се роди идејата за When in Krusevo и што е тоа што овој фестивал го прави толку посебен?

Димитар: Идејата за фестивалот се роди од нашиот главен иноватор Антонио, а ние останатите како тим веднаш ја прифативме и мислам дека до ден денес одлично ја одржуваме и спроведуваме. Посебноста на When in Krusevo е тоа што самиот фестивал е направен со многу љубов, ентузијазам и енергија. И мислам дека е еден од ретките фестивали во Македонија кој вклучува толку многу активности, забава, дружење, а воедно и огромен придонес за нашиот град. Она што малкумина го знаат е дека без разлика што фестивалот трае само три дена, истиот Крушево го става на мапата на најатрактивна туристичка локација во државата. Она што е особено значително за истиот е тоа што дополнително придонесува на приватното сместување, угостителските објекти, малите локални продавници како и огромна промоција на културните знаменитости на нашиот град. По наша иницијатива крушевското езеро ја доби денешната атрактивност и убавина, за која придонесовме со реконструкција на двата моста, поставување на корпи за отпадоци, како и иницијатива за инфраструктурно подобрување на самата локација.

Advisor: Што научивте како тим изминатите неколку изданија?

Димитар: Според мене тимското работење е клучно за опстанок на овој фестивал. Без разлика кој колку придонесува за него. Мислам дека треба да ја задржиме само позитивната мисла и енергија, а најважно е секогаш да бидеме подготвени за нови идеи и критики, без кои не можеме да бидеме подобри.

Advisor: Твојата омилена активност/содржина/детаљ од фестивалот? Сигурно имаш и ти како организатор? 😁

Димитар: Јас како љубител на планините и велосипедот, најмногу се радувам на планинарските и велосипедските тури. Но, искрено целиот концепт на фестивалот го сакам премногу затоа што секоја ситница е приказна за себе. Одите на Крушевското Езеро, гледате кампери кои уживаат во мирот, на Мечкин Камен „врие“ адреналин со најдобрите наши параглајдеристи, вечерните журки ги собираат на едно место младите и старите, а детските игри се посебно катче за најмладите.

Advisor: Имаме еден предизвик за тебе. Дали ветуваш дека твојот син ќе го наследи фестивалот и по некои 15,20 години ќе ја преземе организацијата 😜? Ова прашање го поставувам затоа што сакам да ти честитам за Јан и да посакам вашето синче да биде здраво и живо, но и да ги запознаеме читателите дали и каде долгорочно го гледате When in Krusevo?

Димитар: Ти благодарам но за тоа ќе мора да го прашаш Јан за 15, 20 години 😊 Мојата цел како родител е да му ги пренесам високите вредности, љубовта кон мојот роден град Крушево и нормално секогаш да биде човек кој ќе ги почитува и ќе им помага на другите. Од него самиот зависи во која насока ќе одлучи да му се движи животот. А се додека ја имаме поддршката и помошта за When in Krusevo толку долгорочно и ќе трае истиот, без разлика дали сум јас или некој друг.

Колку убав разговор, за еден настан кој ни’ влезе во крвта и прераснува во традиција.

Картите се пуштени во продажба. Купете си на следниот линк.

Со секој билет добивате и уникатно дизајнирана маичка од Зоран Кардула.

Се гледаме во Крушево !

Share on:

Вело дестинација Крушево

Вело дестинација Крушево

Градот добива нови велосипедски патеки, а тоа значи ново доживување на крушевската природа.

Хотелот Панорама & спа постојано вложува во подготовка на велосипедски патеки. Ако пред неколку години се’ започна со првата крос кантри вело трка, денес комплексот на хотели и ски центарот го комплетираат процесот со вкупно 7 патеки.

Дополнително на тоа, и општината оспособи уште една патека која спаѓа во рангот на т.н. спуст патеки. Се на се’ Крушево полека се издигнува на мапата на вело дестинации заедно со првичните 42 км патеки кои локалната самоуправа ги подготви уште пред неколку години.

Во 2022 година се одржа првата крос кантри трка, а минатата година во рамки на When in Krusevo се организираа и неколку трки во планински велосипедизам. Што покажува тоа? Дека крушевчани очекуваат повеќе луѓе да го посетат Крушево понесувајќи го велосипедот со себе или, пак, тука да изнајмат еден и да уживаат.

По повод Светскиот ден на велосипедот – 3 јуни хотел Панорама & Спа нуди бесплатно изнајмување на велосипедите. Ова важи секој викенд во текот на месец јуни.

Покрај Панорама велосипеди издаваат Casa Mular Krusevo, Хели ХЦ параглајдинг клубот, а за многу брзо очекуваме нов проект од Св. Никола бутик хотел.

Крушево е растечка вело дестинација, а самите инвестиции и конкретниот пристап оставаат впечаток дека на долг рок градот може да стане многу атрактивно место за практикување на спортот, на аматерско и професионално ниво. Во меѓувреме, ние крушевчани секако дека ќе уживаме во возењето велосипед :P.

Share on:

АТВ тура со водич – ново доживување во Крушево

АТВ тура со водич – ново доживување во Крушево

Крушево, одново, нуди нови искуства. Посетете го Крушево и уживајте во возењето на АТВ четирицикл по падините на Бушева планина, а ние ќе се погрижиме да имате добар домаќин и водич.

Изминатите години Крушево забрзано се развива во понудата како туристичка дестинација. Ако порано градот нудеше само културни манифестации и дегустација на крушевската кујна, денес нуди многу повеќе. Тандем параглајдинг, планинарење, велосипедизам, ботанички тури, јавање коњи, авантуристички парк и возење на АТВ се само мал дел од крушевската туристичка понуда.

Изминатиот викенд имавме гости од Битола. На своите „мотори на 4 тркала“ тие допатуваа до Крушево каде што ги пречека уште еден љубител на овој „мотоспорт“. Младиот Таки Јуца ги предводеше гостите на кратка тура во Крушево, со посета на Мечкин Камен, полетувалиштето за параглајдинг и самиот град. И гостите и нашиот домаќин се согласија во првата наредна прилика да се „проба“ панорамска тура која опфаќа преубави предели од Бушева планина.

Она што Викенд во Крушево и нашиот домаќин го нудиме е водич во панорамските тури со АТВ. Контактирајте не’ доколку сакате авантура и максимално уживање во крушевските предели.

Фејсбук: Викенд во Крушево
Моб: 072 264 157

-1

Share on:

Високо на 1 400 метри

Високо на 1 400 метри

Веќе зборувавме и пишувавме за Мечкин камен. Боите кои се распостелуваат на ова историско место се најубави оваа есен. На пат кон ова истовремено излетничко место е и полетиштето за параглајдинг. Тоа е неизбежно. И погледот од таму е прекрасен, но особено одзема здив оваа есен и во овие сончеви денови.

Еве пак ќе се потсетиме на боите на есента кои се можеби највпечатливи на Мечкин камен, ама ќе ве потсетиме и на постот кој го посветивме на ова место.

Прочитај повеќе: Мечкин камен деновиве – неповторлива прилика

После овој пост (на линкот погоре) повторно се навраќаме на ова место. Деновиве и по објавување на овој блог пак ќе се вратиме оти е прекрасно. Свежо е, но боите и сонцето го привлекуваат нашиот тим одново да се враќа тука горе на 1 400 метри надморска висина.

Доволно е до овде да дојдете со автомобил и само да го истражите ова место. Ако сте за прошетка можете комотно да испешачите околу 3 до 4 километри до Мечкин камен и од 1 250 да се искачите на 1 400 м.н.в. Оставаме на вас. Ама, како и да е ова место топло го препорачуваме оваа есен.

Прогнозата за временските услови вели дека времето ќе остане претежно сончево и температурата од ден во ден ќе се подигнува. Затоа, ако доаѓате од друг град овој викенд дестинацијата која ќе ја изберете е токму Крушево, а дел од агендата мора да биде Мечкин камен.

Застанете на самото полетиште. Значи морате ! ! ! Оттука погледот е феноменален. Ја гледате Пелагонија. Гледате разнобојни дрвја. Гледате сино небо. Вдишувате, издишувате. Среќни сте. Мирот го вдишувате, стресот го издишувате.

Летото во Крушево е убаво. Тоа е посвежо и полесно за дишење. Зимата е убава заради снегот. Пролетта е добра како најава за летото. Но, овие фотографии покажуваат дека есента е подеднакво привлечна. Мислам дека ве уверивме со нашите фотографии и пренесени искуства.

Пишува: Сотир Габелоски

Share on:

Тури