Marija Filipova

Мазник со грав- „Крушевски готвач – книга со рецепти“

Рецепт број 6: Мазник со грав

Потребно е: тесто од 1 кг брашно, вода, малку масло и сол. Тестото да биде меко. Претходно се вари 500 гр грав да биде убаво сварен и да остане зрнест. Се става сол по вкус на гравот. Од тестото се делат топчиња околу 12 да бидат исти. Секое топче се сука кора тенка и се потпекува на шпорет на дрва од двете страни. Корите потпечени се редат во поголема тава подмачкана со масло. Се реди кора, целата се попрскува со масло и се распоредува сварениот грав. Постапката се повторува со сите кори и на крајот горната кора малку се набрува и се сечи на коцки и убаво се намрсува и се потура со една чаша кисела вода. Се печи на 200 степени. Мазникот може да се прави и со испржен праз.

Оваа објава е дел од серијалот на рецепти предложени и подготвувани од здружението „Цвет“ од Крушево. Рецептите се дел од книгата „Крушевски готвач- книга со рецепти“.

Раванија- „Крушевски готвач – книга со рецепти“

Рецепт број 5: Раванија

Потребно е: 8 јајца, 2 лажици шеќер, 2 лажици брашно, 8 лажици Гриз, 1 пециво, ванила, 800 гр шеќер, 600 гр вода, малку кора од лимон. Се матат 8-те белки во цврст снег заедно со шеќерот, се додаваат жолчките и пак убаво се мати. Со лажица се додава гризот и брашното помешано со пецивото и убаво се меша. Се печи на 180 степени во тава број 30. Откако ќе се испечи се сечи на ромбови.

Шербет: 800 гр шеќер и 600 гр вода се ари околу 3 минути, се додава ванилата и кора од лимон. Се попарува ладната раванија со топол шеќер.

Оваа објава е дел од серијалот на рецепти предложени и подготвувани од здружението „Цвет“ од Крушево. Рецептите се дел од книгата „Крушевски готвач- книга со рецепти“.

Крушевска алва- „Крушевски готвач – книга со рецепти“

Рецепт број 4: Крушевска алва

Потребно е: пола чаша масло, 1 чаша гриз, 1 чаша брашно, 2 чаши шеќер, 3 чаши вода, ванила, сецкани ореви. Во длабок сад се пржи гризот со брашното додека да добие кафеава боја, се додава масло и пак се пропржува. На крајот се додава водата, ванилата и шеќерот па сето тоа се меша додека да се згусни алвата. Се додаваат оревите и се тура во тава додека е топла. Со голема лажица се прават форми од алвата.

Оваа објава е дел од серијалот на рецепти предложени и подготвувани од здружението „Цвет“ од Крушево. Рецептите се дел од книгата „Крушевски готвач- книга со рецепти“.

Питулици со лук -„Крушевски готвач – книга со рецепти“

Рецепт број 3: Питулици со лук.

Потребно е: 1 кг брашно, вода, сол, лук и ореви (по желба). Се замесува тестото за питулиците, каша од брашно и вода и малку сол како за палачинки. Се тура од тестото на питуличарка, се разредува тенко и се печи на питуличарка, а потоа се потпекуваат питулиците од двете страни на шпорет. Се прават додека се потроши целата каша.

Се зема тава. Вариме солило од масло, вода и сол. Го толчиме и лукот. Питулиците ги макаме во врелото солило и ги редиме во тавата и на секој ред попрскуваме лук и сецкани ореви. Потоа се сечат на парчиња, се тура останатото солило и малку се потпекуваат во загреана рерна.

Оваа објава е дел од серијалот на рецепти предложени и подготвувани од здружението „Цвет“ од Крушево. Рецептите се дел од книгата „Крушевски готвач- книга со рецепти“.