Еден е Тоше… Помина уште еден роденден

Еден е Тоше… Помина уште еден роденден

Во снежно Крушево се одбележа уште еден роденден на Тоше. Со негови фанови од државата и странство Тоше Проески повторно живееше преку своите песни.

Снежно утро со густа магла. Студено време кое ги натера крушевчани и посетителите на градот да стават уште еден слој облека на себе додека се упатуваат кон спомен куќата „Тодор Проески“. Времето најавуваше студ, додека во нашето срце е уште поладно затоа што од 2007 година го нема нашиот пејач и голем хуманитарец.

Луѓето се упатуваат најпрво кон Тошевото вечно почивалиште. Палат свеќа и размислуваат колку е жалосно што ова младо момче денес можеше да има над 40 години. Чувство на студенило ги обзема сите негови фанови – „Како можеше да се случи?“ тоа што се случи пред 15 години – се прашуваат сите.

Спомен куќата „Тодор Проески“, вториот дом на Тоше, подготвува програма во која негови фанови, колеги и уметници ќе ги отпеат неговите песни, ќе насликаат негов портрет и ќе доловат моменти кои потсетуваат на неговата големина.

Со самиот влез во спомен куќата се чувствува топлина. Нашите срца се затоплуваат затоа што го чувствуваме неговото присуство преку песните кои се емитуваат постојано во спомен куќата. Поминуваме покрај изложба која отсликува љубов за Тоше, а негови колеги го започнуваат настапот. Ги пеат неговите песни и навираат толку емоции. Сите слушаме внимателно, потпевнуваме затоа што неговите песни никогаш нема да загинат.

Се стоплуваме во душата, затоа што Тоше замина, но неговите песни се безвременски. Сите во еден глас, во своите мисли се уверуваме дека Тоше има само датум на раѓање.

Но, не само неговите песни, на одбележувањето на неговиот роденден илустрирана е неговата хуманост. Редици луѓе чекаат во ред да донираат крв, да покажат хуманост и така да изразат чест кон Тоше. Тоше беше хуманитарец, тоа сите го знаеме, беше ангел, го знаеме и тоа, но не знаеме за многу негови добри дела. Неговите песни милуваа душа, а добрите дела спасуваа животи – то е наследството на Тоше Проески.

Помина уште еден 25 јануари, а Крушево размислуваше и зборуваше за Тоше. Се разбудија многу емоции, а ние како негови фанови се сеќававме на спомените од него. Тоше продолжува да живее преку неговите песни, но и сите познати и непознати дела.

Share on:

За нови викенди во Крушево во 2023

За нови викенди во Крушево во 2023

Многу викенди заедно поминати, а во последните денови од 2022 година да наздравиме за уште повозбудливи викенди во Крушево во Новата 2023-та.

Крушево станува се поомилено место. Туристите се тука буквално секој викенд. Верувајте, го разубавувате нашиот град.

Планинаревме, пробавме тандем параглајдинг, возевме точак, вкусувавме традиционална храна, уживавме во домаќинлакот на крушевските угостители, трчавме и се натпреварувавме, танцувавме на музика, вдишувавме и издишувавме адреналин… Многу активности во годината што изминува. Токму набројувањето на само дел од нив го прави дочекот на Нова година уште повозбудлив.

Многу од Вас, драги читатели, уште од петок ќе бидете во Крушево. Заедно ќе ја дочекаме 2023 година и со сонце низ прозорецот ќе се разбудиме на првото утро. Останатите кои ќе бидат во некој друг туристички центар во Македонија сигурно го испланирале првото доаѓање во Крушево наредната година. Викенд во Крушево ве предизвикува веќе во јануари да биди вашето прво патување до градот на 1 250 метри надморска висина. Резервирајте го вашето место и уживајте во чистината и свежината на нашиот и ваш град.

Крушево е подготвено за исполнета, возбудлива и содржајна 2023 година. Ве очекуваме час поскоро!

Share on:

АТВ тура со водич – ново доживување во Крушево

АТВ тура со водич – ново доживување во Крушево

Крушево, одново, нуди нови искуства. Посетете го Крушево и уживајте во возењето на АТВ четирицикл по падините на Бушева планина, а ние ќе се погрижиме да имате добар домаќин и водич.

Изминатите години Крушево забрзано се развива во понудата како туристичка дестинација. Ако порано градот нудеше само културни манифестации и дегустација на крушевската кујна, денес нуди многу повеќе. Тандем параглајдинг, планинарење, велосипедизам, ботанички тури, јавање коњи, авантуристички парк и возење на АТВ се само мал дел од крушевската туристичка понуда.

Изминатиот викенд имавме гости од Битола. На своите „мотори на 4 тркала“ тие допатуваа до Крушево каде што ги пречека уште еден љубител на овој „мотоспорт“. Младиот Таки Јуца ги предводеше гостите на кратка тура во Крушево, со посета на Мечкин Камен, полетувалиштето за параглајдинг и самиот град. И гостите и нашиот домаќин се согласија во првата наредна прилика да се „проба“ панорамска тура која опфаќа преубави предели од Бушева планина.

Она што Викенд во Крушево и нашиот домаќин го нудиме е водич во панорамските тури со АТВ. Контактирајте не’ доколку сакате авантура и максимално уживање во крушевските предели.

Фејсбук: Викенд во Крушево
Моб: 072 264 157

-1

Share on:

Зошто е толку убаво во јануари?

Зошто е толку убаво во јануари?

Јануари е посебен месец, а зошто е тоа така прочитајте во редовите подолу.

Нова година е секогаш посебно убава во Крушево заради големиот број посетители, убавото време и снегот. Оваа година беше така, со исклучок на снегот.

Времето на 31-ви декември, на 1-ви и 2-ри јануари беше вистинска пролет. Можеби немавме снег, но имавме сончево време кое го искористивме за прошетка до Крушевско Езеро и забава со жива музика под отворено небо на Станич.

Потоа доаѓа празникот Дева кој е предвесник на Бадник и Божиќ. Уникатноста во Дева е што се работи за празник кој во христијански контекст го најавува Христовото раѓање. А, во Крушево најмладите со импровизирана ѕвезда во рацете ги посетуваат домовите и шират радосни песни. Овој празник привлекува се поголем интерес кај туристите. На овој начин 5-ти јануари се одбележува само во Витлеем, Израел.

На крајот на месецот се одбележува денот на раѓање на Тоше Проески. 25-ти јануари е денот кога луѓе од Македонија, Србија, Хрватска, Словенија, Бугарија… се собираат во Крушево за да покажат дека Тоше има само датум на раѓање.

Но, еве деновиве снегот повторно се врати кај нас. Имаме 30 центиметри снег и времето се отвора. Типичниот јануари е повторно во Крушево. Погледнете фото подолу.

Тоа е нашето Крушево. Нашиот град е поубав од викенд во викенд. Станува едно од најпопуларните места, а за тоа не е виновен само снегот, туку и сите гости од државата и надвор од неа. Крушево е наше и ваше. Крушево во јануари е дестинација само за вас.