Интервјуа

Љубовта кон музиката е огромна, сподели со нас Dj Јован Шапе

Јован Шапе е долгогодишен диџеј, па со задоволство направивме интервју со него, а тој сподели интересни работи со нас.

Пред се, го прашавме кога е роден? – ,,Роден сум на 04.09.1980 година во Прилеп. ”

Потоа, од кога си диџеј? Тој ни одговори дека како диџеј почнал да се занимава од 1996 година, или поточно пред 24 години во тогашната актуелна дискотека во Крушево,(Disco Pub ANDORA) или како што Крушевчани милуваат да ја нарекуваат кај Вуле.:)

На следното прашање, зошто се занимаваш со тоа, тој ни кажа: – ,,Љубовта кон музиката е огромна која кај мене датира од 1986 тата година. Во мојата фамилија се негувала музиката отсекогаш,почнувајќи од мојот дедо Јован Вана Шапе кој бил првиот поп пејач на балканот и мојот татко Крсто Ставре Шапе кој бил вокал во првиот музички состав ВИС Илинднски Искри во Крушево. Уште на 6 годишна возраст се роди таа љубов кај мене,поминувајќи голем дел од денот покрај радиокасетофонот и слушајќи ги тогашните трендовски музички радио програми.Исто така подоцна доаѓајќи си од школо едвај чекав да стигнам дома и на системот да миксам и уживам во тоа.Секогаш кога ќе влезев во некој клуб или некоја дискотека,мене не ме интересираше инвентарот,послугата и слично,мене ме интересираше кој пушта музика,како ги микса песните ,какво озвучување има ете баш тие работи. Со тек на време знаев дека мора да го направам и тој чекор и да почнам да пуштам музика т.е да се бавам до диџејство.Кога сум позади микспултот,целосно ја предавам мојата позитивна енергија кон публиката и кога таа енергија ми е возвратена ете тој филинг е тоа вистинското за мене.Обожавам кога публиката е среќна,разиграна,насмеана,гласна и на крај задоволна,тоа највеќе ме исполнува.Ете поради сето тоа сакам да се занимавам со диџејство.”

На прашањето дали во иднина мислиш да се занимаваш со диџејство, тој рече: ,,Желбата постоела и ќе постои,така да секако планирам никогаш да не престанам да го работам тоа. “

Следно што го прашавме Dj Jovan беше дали постојат познати личности странски или наши кои му служат како инспирација, па одговори: ,,Секако дека има и странски и наши изведувачи кои ме инспирираат,тоа се Диџеи,машки и женски вокали како денешни така и поранешни.”

Кажи нешто интересно за тебе? – ,,Како што кажав,голем љубител сум на музиката,посебно на клубската и хаус музиката.Најголем виновник за тоа е  мојот прв братучед,Ристо(Ице)Митаноски кој во тоа време беше најдобриот диџеј кај нас.Еве накратко ќе ви кажам како ми се роди желбата. Кога  диџеј Ристо ќе пушташе музика,а во тоа време да напоменам дека се пушташе на касети,јас секогаш седев до него и го пратев која песна од која касета ја пушта и на кој начин ја микса.Така по некое време јас ги научив сите песни на која касета се наоѓаат (а имаше преку 300 касети)и песната што диџеј Ристо ќе ми ја побараше јас точно знаев на која касета е и веднаш му ја подавав.Замислете тоа го правев од љубов,од што ми беше убаво,убаво се осеќав пред се,никој не ме терше со сила.И така по некое време почнав порано да доаѓам во дискотеката и да го користам времето да ги миксам омилените песни се додека постепено се полнеше диското за да откако ќе се наполни да настапи диџеј Ристо.Како поминуваше времето така се повеќе и повеќе ја добивав довербата и минутажата кај Ристо се разбира и сите негови диџејски трикови,совети,корекции итн. Па така една вечер Ристо не успеа да стигне од Скопје за Крушево и таа ми беше мојата прва вечер да настапувам сам која никогаш нема да ја заборавам. “

Следно, каде се имаш настапувано? – ,,Обично настапите ми се во нашата земја. Нормално не ги бројам дешавките кога сум бил на одмор или некое патување и надвор од нашата земја па често сум застанувал да измиксам по еден сет позади микс пултот,секако тие се неофицијални журки.”

Кој од настапите ти останал во сеќавање и зошто? Па ни одговори: ,,Не можам прецизно да ви одговорам на ова прашање,бидеjќи секој од моите настапи има различна приказна,нормално со happy end, а верувајте ги имало многу. Ајде ќе се обидам барем малку да доближам,еве како најдраги настапи ди ги издвоил оние во нашето Крушево, во Клуб Планет каде со Шестич верувајте ги правевме најдобрите журки кои надалеку се слушаа.Публиката уживаше,пееше и аплаудираше до раните утрински часови.Во најголемо сеќавање ми останале и ги издвојувам настапите во Клуб Планет  заедно со нашиот крушевчанец ,мој најдобар другар,најголем и најдобар вокал на сите времиња Тоше Проески, каде додека пуштав музика Тоше умешно влегуваше во ритам и многу прецизно и точно го миксаше својот вокал во секоја песна што ќе ја пуштев.Верувајте тој склоп звучеше прекрасно.Едноставно посакуваш журката никогаш да не заврши.Публиката лудувше,ечеше и не пратеше цело време.Забавите со Тоше беа друга димензија. Ете тие несекојдневни настапи можам да ги издвојам како  најомилени.”

Кажи некоја интересна случка поврзана со диџејството? – ,,Уф, има доста случки кои се имаат случено, нормално некои се, некои не се за јавност (хахаххаах) Еве ќе кажам најчеста случка која морам да признаам порано повеќе беше застапена ,сега за среќа многу поретко, а тоа е додека пуштав house музика задолжително ми доаѓаше некој дечко или некоја девојка и ми бараа да пуштам турбофолк песна. Во тој момент стварно не знаев како да изреагирам, дал да плачам ил да се смеам (хахахахахах) А уште пострашно е доколку се многу пијани и често се случувало да ми ги истурат пијачките врз миксетата и во тој момент имам проблем, нема музика. Ете тоа е „disaster„ и дефинитивно  во тој момент ти се плаче, мора да бидеш многу снаодлив и искусен за да повторно ја вратиш ситуацијата во нормала, за да продолжи забавата. ”

Потоа, во кои градови најчесто си настапувал? – ,,Моите настапи најчесто биле во нашата земја и тоа во Крушево,Скопје,Прилеп,Битола,Кавадарци,Тетово,Струмица,итн. Доколку заборавив некое место да набројам, sorry без замерки.”

Dj Jovan на прашањето што ќе им порачаш на сите оние кои ја слушаат твојата музика, ни одговори: – ,,На сите оние што ја слушаат мојата музика им порачувам и понатаму да ја слушаат, да продолжат да ме поддржуваат,да се сакаат и како и секогаш да шират позитивна енергија.”

И како последно прашање, кој е твојот предлог за подобрување на културно-забавниот живот во Крушево? – ,,Морам да ве пофалам пред да го одговорам последното прашање, дека во последниве години вашиот тим одлично го надополнува културно забавниот живот во Крушево, целосно сте вложени и ви успева сето тоа, на што сме и самите сведоци.Одлично функционирате,продолжете да ги негувате локалните диџеи,тоа е многу битно, и само како моја идеја или надополнување на сето тоа што го правите е во иднина да се донесе некое звучно име, мислам на странски диџеј и повторно заедно да докажеме дека воопшто не заостануваме зад никого и дека крушевчани биле и ќе бидат позитивен пример за добра музика и забава како и секогаш. ”

На крај, му се заблагодаруваме на Јован Шапе за одвоеното време и краткото интервју, па му посакуваме уште многу успеси како во животот така и во диџејството.

Музиката не’ исполнува, не’ прави среќни и задоволни, велат од ,,Инвиктус” .

Направивме едно интервју и со нашата позната група ,,Инвиктус’, која после кратка пауза повторно се врати на „крушевската сцена“’.

Сите ние ги знаеме како група која прави одлични забави, како во нашиот град, така и пошироко. Па и тие се согласија да одговорат на неколку наши прашања.

Прво, започнавме со прашањето од кога постои групата? –,, Групата Инвиктус постои од 2014 година. ”

Зошто почнавте да се занимавате со тоа? На тоа ни одговорија дека рок ен ролот како музика, култура и начин на живот, е тоа што нас не исполнува, не прави среќни и задоволни, затоа и се занимаваме и се трудиме да свириме рок музика.

Следното прашање, дали и во иднина планирате да се занимавате со музика? Следуваше позитивен одговор, да, се разбира.

Дали познати бендови, странски или наши, ви служат како инспирација? – ,,Не само ние, сите бендови кои започнале да се занимаваат со овој жанр на музика биле силно инспирирани од легендарните светски бендови, а исто така наша инспирација се и неколку рок бендови од бившите ЈУ простори, а тука спаѓаат и македонските, се разбира. “

Групата сподели и една интересна случка поврзана со нивен настап. ,,Период пред Нова година, во Крушево, настапувавме како предгрупа на групата „Фрајле“. Беше навистина една фрка, бидејќи требаше да свириме прво ние, па потоа да настапат „Фрајле“, а после нив, повторно ние до фајронт. На бината не беше баш комотно, а имаше многу инструменти. Дојде време да почнеме со свирење. Како што се подготвив јас за почеток, се завртив кон Благојче (тапани) и Мики (бас гитара) за да започниме, но во моментот кога погледнав накај Мики, забележав дека нешто не е во ред, а тој видно вознемирен пребаруваше околу инструментите. Го прашав, „Мајк, шо бараш“?! А, тој ме погледна и ми одговори, „Ми ја нема гитарата“. Навистина беше малку конфузна и вознемирувачка ситуација, но по неколку минути, успеавме да ја пронајдиме. ”

Во кои градови најчесто сте настапувале? –,,Крушево, Прилеп, Битола, Скопје и Штип. ”

Ни ја раскажаа и нивната приказна за основање на групата и за членовите во групата. ,,Пред да биде формиран бендот Инвиктус, јас заедно со Пеце Христоски (екс Инвиктус), после неколку годишна заедничка соработка, сфативме дека е време да формираме еден вистински сериозен бенд и така се одлучивме да ја започниме приказната. Првиот состав броеше 4 (четворица) членови и тоа: Велко Николоски (вокал, гитара), Пеце Христоски (клавијатури,), Благојче Нанески (тапани) и Коста Стевановски (бас гитара). ”

Кој од настапите ви останал во сеќавање? – ,,Настапот на летниот фестивал „When in Krusevo“ во Крушево, летото 2019 година. Беше одлична атмосфера, свиревме пред публика која ја разбира музиката што ја свириме и имавме прекрасен фидбек од нивна страна.”

Со нас го споделија и начинот на кој го избрале името на групата. ,,Обично многу бендови се именувале спонтано. Искрено околу името ни требаше одреден период да размислиме. Името „Инвиктус“ го предложи екс басистот Коста Стевановски, а не беше потребно многу за да биде прифатено и од нас. ”

Што ќе им порачате на сите оние кои ја слушаат вашата музика? –,,Би им порачал и понатаму да доаѓаат и да ги посетуваат нашите свирки, бидејќи навистина ни значи нивното присуство и поддршка. “

Како последно прашање за ,,Инвиктус” беше: Кој е вашиот предлог за подобрување на културно-забавниот живот во Крушево? – ,,Ние најпрвин би им порачале на граѓаните, особено на младите крушевчани, да слушаат добра, квалитетна музика, бидејќи жалосно е да ги минуваат најубавите години слушајќи лоша музика, а да не дознаат за тоа кои биле Битлси, Хендрикс, Џоплин, Цепелин, Парпл, Снејк…нивната идеологија, борбата против војните во светот преку музика, ширењето мир и љубов. Исто така би предложиле да се организираат што повеќе културни настани со настапи на наши македонски бендови кои се навистина квалитетни и да се одржуваат живи свирки во кафичите без турбо фолк музика. “

За крај, ние му се заблагодаруваме на Велко Николоски, кој одговараше на нашите прашања, а на ,,Инвиктус” му посакуваме уште многу успешни настапи.

Кико Филипоски ја сподели со нас приказната за неговите почетоци и успеси во музиката

Кире Филипоски (Кико), ни одговори на неколку наши прашања за неговата љубов кон музиката.

И него пред се’ го прашавме колку години има и со што се занимава моментално, па тој ни одговори: ,,Имам 26 години, моментално се занимавам со музика.”

Од кога се занимаваш со музика? – ,,Со музика се занимавам веќе 8 години.”

Следно, каква музика слушаш? – ,,Слушам секаков вид на музика, голем обожавател сум на поп-рок музиката, но го работам тоа што го бара публиката. “

Како следно прашање беше зошто се занимаваш со музика, па тој ни рече: Со музика се занимавам затоа што тоа е моето најголемо хоби, морам да кажам дека потекнувам од музичка фамилија и секако тоа ме исполнува.

Во кој бенд си моментално? – ,,Моментално сум во “ Кико и Коки “ бенд кој се состои од два члена, гитара и клавијатура. “

На прашањето, во кои други бендови си бил, ни одговори дека почетоците од кариерата ги започнал во бенд “ No Name “, за различни настани работел и со други бендови.

На нашето стандардно прашање дали има некои познати личности, странски или наши, кои служат како инспирација, или пак некој бенд можеби, како одговор следуваше: ,,Секако дека има, на прво место ми е нашиот легендарен и незаменлив пејач Тоше Проески, исто така обожавам да ги слушам и Здравко Чолиќ, Дино Мерлин, Џенан Лончаревиќ, Бјело дугме, Рибља Чорба и секако многу многу други ” …

Сакавме да ни каже нешто интересно за себе, па ни одговори: ,,Јас по природа сум скромна и срамежлива личност, љубител сум на природата, сакам мирни и тивки места. Најчесто после свирките си доаѓам во родниот град Крушево, каде што го пронаоѓам мирот и ги полнам батериите. “

Ни ја раскажа и кратката приказна за почетоците во музиката.. Моите родители уште од мали нозе ја препознале дарбата за музиката во мене, но морам да напоменам дека генот е од мојот татко Сотир Филипоски кој е пејач и гитарист, па така сега јас чекорам по неговите стапки.

Кажи некоја интересна случка поврзана со некој настап? – ,,Секој настап е со различни и интересни случки, искрено во моментов не ми текунва некоја што можам да ја издвојам. ”

Следно, ни раскажа за неговиот настап кој му останал во сеќавање. ,,Имав можност во 2015 година да учествувам на големото музичко шоу “ Пинкове ѕвезде “ и честo да пеам пред големи музички ѕвезди. “

И како последно прашање, кој е твојот предлог за подобрување на културно-забавниот живот во Крушево? – ,,Па мислам дека треба да се организираат настани од секаков вид, кои ќе ги предизвикаат сите генерации, а најчесто помладата генерација која може да биде дел од истите и останатите љубители на градот Крушево. Исто така можам да кажам дека во нашиот град има доста генерации кои во себе носат по некој талент, но претежно е музичкиот талент. “

Му благодариме на Кико за краткото интервју за нашиот вебсајт и му посакуваме многу успех понатаму во музиката.

Тошо Јуца и неговата приказна за музиката.

Тошо Јуца, наш сограѓанин кој се занимава со музика, сподели интересни работи со нас.

Направивме мало интервју со него, па како прво прашање беше поставено: Кога си роден и со што се занимаваш моментално? А тој ни одговори: ,,Роден сум на 8-ми јуни, во не толку далечната 1991год. Моментално работам во приватна фирма, нешто сосема различно од музиката. “

И него го запрашавме од кога се занимава со музика, па како одговор следеше дека- ,,Со музика се занимавам од мојата 13 (тринаесетта) година, првенствено како хоби, а потоа и професионално. “

Каква музика слушаш? – ,,Слушам секаков вид на музика, тоа ми е дел од професијата. Приватно знам да се опуштам со добри “Рок” и “Блуз” класици. “

На тоа зошто се занимаваш со музика ,тој ни’ одговори: ,,Искрено, немам збор со кој би го опишал тоа чувство, пред се за сопственото задоволство, и енергијата која музиката ја пренесува, на другите луѓе, на публиката. Тоа е магија 🙂 “.

Покрај тоа што работи во приватна фирма, тој се уште се занимава со музика, па го прашавме во кој бенд е моментално и во кои други бендови настапувал. –,,Моментално работам со бенд (Артико Бенд), со уште четворица  колеги од Факултетот за музичка уметност во Скопје. Сум бил дел од повеќе бендови и различни состави, генерално локални. “

Дали се’ уште настапуваш со твојот брат или само со бендот?- Не. Моментално функционирам само со бендот.

И тој има свои познати личности, странски и наши кои му служат како инспирација, па тој на тоа прашање ни одговори: ,,Секако дека има. Како инспирација пред се би издвоил еден  фантастичен музичар од нашиве простори, кој ако не Тоше Проески. Од светска сцена Ерик Клептон, БиБи Кинг, Гери Мур..”

На прашањето, кажи нешто интересно за себе, тој се насмеа и рече: ,,Јас сум можеби едниствениот музичар кој, од така наречените “тезги” отишол да студира класична музика, обично тоа оди во обратен правец 🙂 . “

Следно, како започна приказната со музиката, тој одговори дека како главен “виновник” е неговиот татко, уште од мал имал прилика да го слуша како свири и пее низ дома, онака за своја душа, од него го наследив талентот и љубовта кон музиката.

Како интересна случка која би можел да ја одвои и да ни ја каже, Тошо рече дека не би можел да издвои нешто посебно, затоа што секој настап е нова приказна, нови луѓе, а на случките им нема крај.

Кој настап ти останал во сеќавање?- ,,Многу настапи ми останале во сеќавање, од прекрасни луѓе, искуства, дружење. Би ги издвоил настапон со Дарио и Миг 21 на Strumica Open Festival, и турнејата во Полска, со Академијата ЕУРО АРТ од Штип.”

И како последно прашање, кој е твојот предлог за подобрување на културно-забавниот живот во Крушево, тој ни одговори: ,,Ова е малку комплицирано. За да се подигне нивото на културно-забавниот живот, треба време, земајќи предвид каде се наоѓаме сега, тоа е подолг процес. Јас лично би го поздравил подвигот, за едниствениот добар настан што му се случил на Крушево, тоа е “When in Krusevo”. За почеток ни требаат минимум 3-5 настани од ваков карактер, на годишно ниво. “

Му се заблагодаруваме на Тошо за краткото интервју и за неговата љубов кон музиката, па му посакуваме успеси на секое поле во животот и повеќе настапи.