Градот Крушево има голема бројка на угостителски објекти, меѓу кои: три хотели (од кои два моментално се во функција), поголем број на кафеани и ресторани, неколку пицерии, кафулиња и еден ноќен клуб. Ноќниот живот претежно во летниот период нуди доста различни видови на забави, главно во кафулињата, но во последните неколку години популарни за излегување се и рестораните и пицериите кои исто така нудат своја програма.
Етно гостилница е едно традиционално место во центарот на Крушево каде што ќе пробате вкусна скара и многу други специјалитети карактеристични за ова поднебје. Етно амбиентот е одлика на ресторанот и оттука вашиот апетит дополнително ќе нарасне.
Коронавирусот го уништи туризмот, но донесе нешто позитивно
Корона кризата донесе големи штети за туризмот и од тоа не изостанува Крушево. Но, како што рекле попаметните од нас во секое лошо има и добро.
Па така, во време на високи рестрикции, полициски часови и затворени кафулиња и ресторани бевме „принудени“ да останеме дома со нашите семејства. Времето кое на претек го имавме го посветивме на различни активности, секој од нас. Меѓу другото посветивме повеќе време на членовите на потесното семејство.
Дел од фотографиите направени во време на корона
Така и јас. Во семејството посветивме сериозно време во период од околу 2 месеци. Слично беше и со поширокото семејство – фамилијата со таа разлика што се слушавме на телефон како никогаш досега.
Имам мајка која што работи во еден од хотелите во Крушево и повеќе од два месеци не одеше на работа. Има и татко кој е „пресен“ пензионер.
Во период од два месеци, особено во викендите кога имаше 24-часовен полициски час, бројот на испиени заеднички кафиња забрзано се зголемуваше. Толку често не сме ручале заедно од кога бев средно (пред 10-тина година). И, толку разговори не сме воделе никогаш досега.
Чувствувајќи ги последиците од кризата на своја кожа не’ натера да ги унапредуваме меѓусебните односи, да најдеме време да се посветиме едни на други и да си раскажуваме за секојдневието надолго и нашироко.
Така што, коронавирусот за туризмот во Крушево беше навистина несекојдневна причина за голем пад, но да гледаме на позитивната страна. Оваа криза на многу од нас ни’ помогна да ги рестартираме социјалните односи со најблиските наши и тоа е голема позитивна работа од оваа криза која можеби ќе се отслика и во туризмот.
Ова социјално зближување кое го имаме, од една страна, сакам да верувам дека ќе не’ натера најпрво да внимаваме на себе и да се грижиме за своето здравје. Од друга страна, новата социјализација очекувам да не’ поттикне на поголема и посуштинска дружба и ценење на домашните атракции и генерално домашниот туризам.
Ако кризата го уништи туризмот, на долг рок бројот на домашни туристи во македонските туристички центри може да се зголемува. И, не како последица на коронавирусот и стравот од патување надвор, туку преку препознавање на домашните убавини. Оваа криза може да донесе поголема соработка меѓу туристичките фактори и константна работа со нас како домашни посетители.
Корона кризата можеби ќе донесе вистинаска и долгорочна имплементација на кампањата #ДомаСиЕДома
Швајцарска амбасада и Агенција за туризам со промотивно видео за Крушево
Промотивното видео за Крушево се подготвува од Агенцијата за промоција и поддршка на туризмот со поддршка на програмата ИМЕ на Швајцарска амбасада.
„Деновиве завршува снимањето на 10 промотивни видеа, за кои Програмата И.М.Е ја поддржа Агенција за промоција и поддршка на туризмот.
Целта на овие видеа е да претстават повеќе домашни туристички дестинации кои нудат содржини за активен одмор. Ова се места каде домашните, но и туристите од регионот и пошироко може да уживаат во активен и еко туризам, преку активности како што се планинарење, (планински) велосипедизам, спортско качување, параглајдинг, нуркање и многу други. И сето тоа во комбинација со традиционална храна, вино и културни содржини.“, пишува во објавата на официјалната стран на Програмата.
Видеото е дел од кампањата #ДомаСиЕДома.
Ова лето Крушево е вашата најбезбедна дестинација.
Крушево е град со долга и позната традиција и култура, каде што живеат фини и скромни луѓе, познати надалеку по своето гостопримство. Секој кој го посетил Крушево барем еднаш, се враќа во своето место на живеење со позитивни искуства и пофални зборови за односот на моите крушевчани. Градот пак, самиот по себе поседува нешто кое можеби не можи точно да се објасни со зборови, нешто што едноставно ни’ дава чувство на сигурност и смиреност, едноставно уживање на некоја крушевска тераса со кафе и поглед кон градот кој личи на свиено гнездо во планината, поглед кон околната природа и планини кои го одземаат здивот.
Крушево е и широко посетен град, особено во летниот и зимскиот период, а е убав град во секој период од годината. Ми се најавува гостин? Тоа секогаш е убаво доживување. Се симнувам на влезот од градот или на крушевската автобуска станица, го пречекувам со сите почести, затоа што е гостин, не е мала работа 🙂 И тогаш, нормално, започнува прошетката низ градот. Го пиеме првото кафе во некој од крушевските кафулиња и потоа продолжуваме понатаму. Се упатуваме кон посета на некој од музеите, кои во Крушево ги има шест. Секогаш е добро да се знае нешто за градот, а кога станува збор за Крушево има многу што треба да се знае од причина што токму тука се одиграле многу значајни настани, многу од нив одиграле и клучна улога во создавањето на македонската држава.
Доаѓа време за
ручек. Тогаш, по желба на гостинот, се упатуваме во некој од крушевските ресторани,
каде што можат да се пробаат доста наши специјалитети, како на пример:
крушевска пита, домашен колбас, чомлек и многу други готвени јадења специфични
за нашето поднебје. Друга опција е да се упатиме кон некоја од крушевските
пицерии, каде што може да се проба вкусна пица подготвена од вештите раце на
мајсторите со долгогодишно искуство во својата работа. Или па, трета опција за
гостите кои преферираат алтернативни дружби е да се оди на некое од
излетничките места во околината на Крушево, како Мечкин Камен, Крушевското
езеро или Кипрово. Таму, покрај тоа што може да се направи скара, нашите гости
имаат можност да уживаат во прекрасната природа и чистиот воздух кој ги
опкружува овие места.
Се упатуваме кон мојот дом. После одморот, попладнето може да се резервира повторно за некоја прошетка. Тогаш се искачуваме нагоре кон некој од крушевските хотели кои се наоѓаат на врвот од градот и имаат летни тераси со прекрасен поглед на самиот град. Таму исто така може да се помине доста квалитетно време, едноставно уживајќи во свежиот воздух, убавото опкружување и разговорот со гостинот кој се интересира и ми поставува различни прашања за градот, а јас му одговарам надолго и нашироко.
Навечер, ако е
викенд, излегуваме да се опуштиме во некоја од крушевските кафеани, каде
најчесто има забави со жива музика. Во работни денови, кога е помалку
раздвижено, се излегува на кафе-шема во некој од крушевските кафулиња или пак
се оди на пријатна вечерна прошетка долж главната улица во Крушево се до
месноста „Гумење“ која претставува еден вид на збиралиште за младите луѓе од
Крушево каде обично се седи на клупи, се грицка сончоглед и се пие пиво и се
водат интересни дискусии.
Гостин во Крушево, едноставно не може да се испрати дома без да му се даде нешто. Најчесто тоа е или некој домашно приготвен специјалитет, или па еден од најголемите специјалитети – крушевскиот локум и целуфките кои се познати надалеку по нивниот специфичен вкус. Само оној кој пробал знае за што Ви зборувам, пријатели! И така, секој гостин од Крушево си заминува среќен и задоволен и секако, сака пак да се врати. Ова е еден пример како со малку може да се направи многу, потребно е само добра волја и желба за промоција на сопствениот град.
