4 причини зошто треба да го посетиш Крушево уште ова лето
Крушево е атракција и затоа секогаш има зошто и има нешто што те привлекува да дојдеш тука и да отседиш неколку дена. Без оглед дали е зима или лето, дали времето е сончево или облачно Крушево цела година изобилува со атракции кои ќе те намамат да го посетиш.
Еве ги нашите причини зошто уште ова лето треба го посетите Крушево.
- Најбезбедна дестинација
Крушево ова лето е најбезбедната дестинација за летување. Додека коронавирусот живее Крушево се покажа како безбедно место за живеење и посета. Во моментов нема заболени од овој вирус, а во целата криза тука се заболија само тројца.
Локалните угостителски објекти ги почитуваат препорачаните мерки за безбедност и заштита, така што и во објектите безбедноста е на највисоко ниво за вас.
Чистиот воздух е секогаш причина плус да се посети Крушево. Особено ова важи за луѓето од поголемите градови и во зима кога воздухот е особено загаден во поголемите градови.
Но, тоа не значи дека луѓето не доаѓаат заради воздухот и во другите годишни времиња. Свежината која Крушево ја нуди во летниот период е она што им треба на многу луѓе. Одморот, многу од туристите, го наоѓаат во таа свежина, во тивкиот ветeр и во уникатна миризба на воздухот.
Во летниот период не само што ќе го почувствувате чистиот воздух тој ќе ви донесе И добар одмор. На ова додадете ја надморската висина од над 1 200 м.н.в и Крушево ќе биде вашиот рај.
Пејзажите на Крушево ќе ги доживеете и на социјалнтие мрежи, но она што ќе го видите при самиот влез во градот, при прошетка низ градот и околната шума и престојот во хотелите ќе ви го одземе здивот. Ќе сакате и да се изнагледате и да направите фотографии од сите агли. Ќе се обидете да го зграпчите најдобриот пејзаж за кога од дома ќе го погледнете ќе замислувате како го вдишувате воздухот и го издишувате сиот насобран стрес.
Во Крушево можете да дојдете само заради пејзажите. Не мора да има попосебна причина од ова.
Веќе од април месец секоја година параглајдеристи од цела Европа започнуваат да доаѓаат во Крушево. Како што навлегуваме во летото небото е се почесто исполнето со параглајдеристи и се погусто со различни бои. Кога ќе почнат меѓународните првенства тогаш е уште повозбудливо да сте на Мечкин Камен и да следите како по неколку пилоти еден по друг полетуваат и чувствувате како адреналинот ви се крева додека ги гледате акробациите во воздух.
Начинот на дружење на крушевчани во летниот период е следниот: кафе во 12 часот, веднаш потоа се упатуваме кон полетиштето за параглајдери и со часови ги следиме полетувањата на параглајдерите и змајарите.
Ова лето е резериврано за чист воздух, неодоливи пејзажи и многу адреналин од авантуристички спортови.
Ова лето бидете во Крушево, затоа што Крушево е вашата најбезбедна дестинација за летување.
Ова се нашите четири причини за ова лето – кои се вашите?
